Stöndum vörð um allskonar!

Aspir

palm_treeÖsp er tré. Undanfarin ár hefur Reykjavíkurborg gagnrýnislaust gróðursett fjölda af Alaskaöspum útum allan miðbæinn. Það er ekki gott. Öspin hentar ekki inní borgum og allra síst í miðbæjum. Aspir henta vel í skjólbelti og útá berangri. Öspin er harðgert tré og hraðsprottið en hún er ekki stásstré. Hún vex bara beint uppí loftið og myndar ekki laufkrónu. Þar að auki er rótarkerfi hennar einstaklega kraftmikið og brýtur sér gjarnan leið í gegnum mannvirki s.s. veggi, gangstéttir og jafnvel klóök og getur valdið miklum skemmdum. Þar að auki er mörgum illa við aspir og finnst þær einfaldlega ljótar og engin prýði af þeim. Besti flokkurinn vill hætta að hugsa skipulag borgarinnar í skyndilausnum og skítareddingum. Besti flokkurinn vill fækka öspunum í miðbænum og planta í staðinn fallegum trjám sem eiga sér lengri hefð í Reykjavík og henta líka betur inní borg en ösp. Það er til svo mikið af fallegum trjám sem dafna vel á Íslandi. Garðahlynur er eitt fallegasta tré á Íslandi. Hlynurinn á horni Vonarstrætis og Suðurgötu er eitt þekktasta tré landsins. Hann er miklu fallegri en ösp. Hann væri til dæmis mjög flottur eftir endilangri Sóleyjargötunni þar sem búið er að plompa niður helling af forljótum öspum. Og svo er það Íslenska birkið. Besti flokkurinn vill sjá meira birki í miðbænum. Allir í Besta flokknum elska birki af því að það er svo íslenskt og fallegt og svo er svo góð lykt af því. Það er svo margt skemmtilegt hægt að gera í trjárækt í Reykjavík. Möguleikarnir eru óendanlegir. Það er til fjöldi fallegra trjátegunda sem hægt væri að skreyta borgina með. Þær plöntur sem vaxa með góðum árangri í Grasagarðinum í Laugardal geta alveg eins vaxið annars staðar í borginni. Gamlar bábyljur eins og “svona vex ekki á Íslandi” hafa verið afsannaðar. Í gamla daga var fólki talin trú um að einu tréin sem yxu hér á landi væru greni- og reynitré. Flestir garðar í gömlum hverfum Reykjavíkur eru ofhlaðnir risastórum slíkum trjám. En þessi hugsunarháttur hefur sem betur fer breyst, fjölbreytni hefur aukist í trjátegundum. Fólk ræktar nú eplatré í görðum sínum og kirsuberjatré með góðum árangri. Miðað við þær framfarir sem hafa orðið í trjárækt hér á landi á síðustu árum, með kynblöndunum og tilraunum, er ekki ólíklegt að einn daginn verði til harðgert yrki af pálmatrjám sem þrífist vel hér á landi. Slík pálmatré mundu sóma sér vel meðfram sjávarsíðunni, gefa skemmtilegan svip og veita skjól fyrir vindum. En þangað til getum við notað aspir í svoleiðis og hoggið þær svo niður þegar pálmatréin eru tilbúin.

Facebook   
 

Besti á Twitter

twitterbestiflokkurinn á Twitter