Stöndum vörð um allskonar!

glæpir

white_collar_crimeGlæpir eru alvarlegt mál. Það er rétt. Öll höfum við einhverntíma framið glæp. Það er ekki gott. Hann var kannski ekki alvarlegur; kannski aðeins smávægilegt hnupl eða handalögmál undir áhrifum áfengis. Vitur maður sagði einu sinni: “Alvarlegasti glæpurinn er ekki að fremja glæp heldur að horfa á einhvern fremja glæp.” Ég held að það hafi verið Benjamin Franklin. Ég man það ekki. Kannski var það Richard Nixon. En skiptir það máli? Ég held ekki. Síðan eru þau okkar sem hafa framið alvarlega glæpi. Það er eitthvað sem við ættum öll að hugleiða. En hvað eru glæpir? Það er misjafnt. Það er það sem er rangt. Rétt og rangt er samt afsætt. Albert Einstein sannaði það í afstæðiskenningu sinni, sem ætti með réttu að heita Afstæðissönnunin, að það sem einum finnst rétt finnst einhverjum öðrum kannski alrangt. Sumir elska ketti en aðrir þola þá ekki. En það hefur ekkert með kettina að gera. Þeir kannski skynja það en þeir skilja það ekki. En það gerum við. Þegar Adam át af Skilningstrénu fór hann að fatta ýmislegt sem hann hafði aldrei pælt í áður. Hann fattaði að hann var allsber og hann sá að Eva var líka allsber. Þess vegna setti hann laufblað yfir píkuna á henni. Það mundi enginn köttur gera. Apar mundu ekki einu sinni gera það.

Glæpamenn vita að þeir hafa gert eitthvað rangt. Nema þeir sem eru síkópatar. Þeir sjá ekkert rangt við neitt sem þeir gera og eru alltaf glaðir, jafnvel þótt þeir séu kannski búnir að drepa einhvern. Það er mikið vandamál. Eftir því sem fleira er bannað fjölgar glæpamönnum. Eftir hið alþjóðlega fjármálahrun mun reglum einnig fjölga. Eftir því sem reglurnar verða fleiri verða fleiri til að brjóta þær. Þannig mun glæpamönnum fjölga mikið á næstu árum. Þetta verða mikið til menn sem voru ekki búnir að heyra um nýju reglurnar og vissu kannski ekki að þeir væru að gera neitt af sér fyrr en löggan kom og handtók þá. Glæpamönnum mun fjölga um allan heim, og voru samt margir fyrir. Fangelsi eru yfirfull um allan heim. Það er dýrt að halda manni í fangelsi. Hér á Íslandi bíða nær 200 manns eftir að komast í fangelsi. En þeir mega það ekki afþví að það er ekki pláss. Besti flokkurinn vill bæta úr þessu. Við viljum reisa stórt fangelsi á Kjalarnesi sem verður rekið af Reykjavíkurborg. Við viljum taka við útlenskum glæpamönnum. Þegar er byrjað að teikna og skipuleggja þetta fangelsi. Þar verða engir hættulegir glæpamenn heldur einungis svokallaðir hvítflibba-krimmar. Fangelsið mun rúma 500-700 fanga hvaðanæva að úr heiminum. Við munum fá miklar gjaldeyristekjur fyrir þetta og um leið skapa fjölda starfa, bæði við uppbyggingu, viðhald og rekstur. Ísland gæti orðið leiðandi á þessu sviði í heiminum. Aðilar á Akureyri hafa sýnt áhuga á að reisa alþjóðlegt öryggisfangelsi í Hrísey. Fangelsið á Kjalarnesi hefur þegar hlotið nafn og mun verða kallað Gnarrenburg.

Facebook   
 

Besti á Twitter

twitterbestiflokkurinn á Twitter