Stöndum vörð um allskonar!

Icesave II

who_is_absentÞað er mikið talað um ICESAVE þessa dagana. Það er gott. Maður er manns gaman. Fólk hittist í sundi og tekur tal saman. Menn horfa saman á fréttir á meðan eiginkonurnar kokka eitthvað góðgæti í eldhúsinu. Þær tala um ICESAVE og hvað það sé sniðugt og afhverju það hafi ekki tekist betur en raun ber vitni. Enginn er með lausn. Stjórnvöld eru hrædd við mennina af því að þeir eru svo reiðir. Allir eru hræddir. Stjórnvöld vilja tala við Hillary Clinton og biðja hana að tala við mennina og biðja þá að láta okkur í friði. Það er góð hugmynd. Hún er frek og klár. Hún talar tungumál sem þeir skilja, það er að segja ensku. En er henni treystandi? Þekkir hún land og þjóð? Þeim fer nú fjölgandi sem vilja tala við Amy Winehouse. Hún er edrú núna. Hún er frek en ekkert rosalega klár. En hún hefur þá ósvífni sem Hillary skortir. Ég hitti frænda hennar síðasta sumar og hann fullvissaði mig um að við hefðum hennar stuðning. Öllum í Besta flokknum finnst þetta mál skemmtilegt og vilja að það leysist. “Ekki gera ekki neitt!” segjum við. Einu sinni var haldið kókaínpartí þar sem allir voru að tala um ICESAVE og hvað það væri sniðugt. Þar sagði ég að ef þetta yrði eitthvað vesen þá myndi ég redda því. Ég ætla að standa við það. Ég skal borga þetta. En er það raunhæft? Ég á engan pening. Væri ekki nær að senda stjórn RÚV sem fulltrúa okkar í ICESAVE deilunni? Það er fólk sem veit hvað það er að gera.

 

Svo þarf að stofna Vörumerkjanafnanefnd sem fer yfir öll nöfn á vörumerkjum þannig að svona lagað endurtaki sig ekki. Margir vilja samt að við hættum að tala við mennina og förum frekar að hóta þeim. Æfleiri semja nú níðvísur um breta, drottninguna og London. Bretar hafa aldrei gefið okkur neitt nema cocktailsósuna. Nú er komið nóg. Við skulum slíta stjórnmálasambandi við þá og safna svo saman öllum galdramönnum- og kerlingum í landinu og bölva þeim á Þingvöllum. Margir vilja líka ákalla náttúruöflin og biðja þau að refsa bretum. Sumum finnst það of langt gengið. Ég veit það ekki. Væri Biskupinn til í að halda bænastund og biðja Guð að gera Bretland gjaldþrota og senda svo engisprettufaraldur á þá? Ég veit það ekki. Á stundum sem þessum er kannski betra að hlusta á unga fólkið. Það mun erfa landið og “koma fram með svörin þar sem sigldum við í strand,” eins og segir í laginu. Það minnir mig á tvo strákpjakka sem ég hitti útí Gróttu um daginn. Þeir sögðust vera tíu ára. Þeir voru með hestshaus undir hendinni og voru að leita sér að báti til að sigla til Englands og reisa bretum níðstöng á Piccadilly Circus. Svona geta krakkar verið sniðugir ef þeir fá frjálsar hendur. Ég vona að þeir hafi farið. Ég vona líka að þeir hafi safnað saman allri cocktailsósu í landinu og tekið hana með sér og afhent hana breskum stjórnvöldum, við hátíðlega athöfn með orðunum “You can have this back you pretendious tee sipping people, cause we have had enough!”

Má bjóða þér ókeypis í sund? Settu þá x við Æ.

 

Facebook   
 

Besti á Twitter

twitterbestiflokkurinn á Twitter