Stöndum vörð um allskonar!

Stefnumál

There are no translations available.

Stefna Besta Flokksins er byggð á því besta úr öllum öðrum stefnum. Við byggjum mest á stefnum sem lagt hafa grunninn að velferðarsamfélögum Norðurlandanna og Norður Evrópu. Það hljómar mjög vel núna. Á sama tíma og bæði forsjárhyggja ríkisrekins áætlunarbúskapar og afskiptaleysi og markaðstrú nýfrjálshyggjunnar hafa beðið skipbrot á örfáum árum standa samfélög byggð á virku lýðræði sterkust. Í velferðarsamfélögum er jöfnuður meiri en annars staðar og atvinnulífið jafnframt samkeppnishæfast. Það er gott. Við Íslendingar líðum nú fyrir að hafa sveigt af leið hinna norrænu velferðarsamfélaga árum saman með dýpri kreppu, meira atvinnuleysi og víðtækara fjármálahruni en flest nágrannalönd okkar. Það er ekki gott og allir eru leiðir yfir því. Vegna þessa á Besti Flokkurinn enn brýnna erindi en áður og mikilvægt að hann verði leiðarljósið við endurreisn efnahagslífs, stöðugleika, velferðar og bættra lífskjara, ljósberinn sem leiðir okkur úr myrkri fornalda og til framtíðar. En við viljum líka viðhalda opnu markaðskerfi og frelsi í viðskiptum án afskipta hins opinbera. Í rauninni erum við samt ekki með neina stefnu en við þykjumst vera með hana.

Besti Flokkurinn er frjálslyndur og heiðarlegur flokkur með skandinavísku ívafi sem vinnur að stöðugum umbótum á samfélaginu og lausn sameiginlegra viðfangsefna þjóðfélagsins á jafnréttisgrundvelli. Við hvorki reykjum né drekkum áfengi. Við viljum skapa samfélag– Besti Flokkurinn, betri en aðrir flokkar!

Besti flokkurinn stendur vörð um stjórnarfarslegt, efnahagslegt og menningarlegt sjálfstæði Íslendinga, byggt á lýðræði, þingræði og réttaröryggi. Fólk er óttaslegið. Það er skiljanlegt. Besti Flokkurinn setur manninn og velferð hans í öndvegi og þar er konan hans ekki undanskilin. Það þarf að hlusta meira á konur. Hættum að segja: “Þetta eru bara einhverjar kellingar að röfla.” Þetta eru ekki kellingar heldur konur og þeirra rödd skiptir líka máli. Við viljum opna Kvennastofu þar sem konur geta komið og fengið sér allskonar kaffi með bragðefnum eins og vanillu og kanil. Og svo mega þær tala eins og þær vilja og það verður allt tekið upp og geymt.

Við erum gegnsær lýðræðissinnaður umbótaflokkur sem byggir á gagnkvæmri virðingu, heiðarleika og jafnræði. Við styðjum stofnun Hugmyndabanka þar sem fólk öðlast vetvang til kynninga hugmynda til framtíðar, í gegnsæju umhverfi. Hugmyndabankinn verður nefndur Sjálfbærnissetur. Bestu hugmyndirnar fá sérstaka viðurkenningu frá Besta Flokknum við hátíðlega athöfn. Þannig styðjum við sjálfbærni. Er hægt að temja hvali og aðra fiska í höfunum kringum Ísland?

Besti Flokkurinn er frjálslyndur og heiðarlegur lýðræðisflokkur sem vinnur að stöðugum umbótum á samfélaginu og lausn sameiginlegra viðfangsefna þjóðfélagsins á jafnréttisgrundvelli, með víðsýni að leiðarljósi. Við viljum skapa besta samfélag sem til er þar sem öllum líður vel og eru glaðir og tala saman um Besta flokkinn og hvað sé best fyrir alla og hvað sé gaman að vera í Besta flokknum. Við ætlum að skipuleggja óvissuferðir fyrir gamalmenni.

Besti Flokkurinn, betri en aðrir flokkar!

Við erum líka með umhverfisvernd og viljum endurvinna allt og nýta sjálfbæra orku, með gegnsærri nýtingu auðlinda, rafmagnsbílum og minni mengun, byggt á jafnræði, samkvæmt gildum flokksins. Við ætlum að mæta á alla fundi og vera alltaf glöð og skemmtileg en líka íhugul, ábyrg og röggsöm

Okkar stefnumál eru bestu stefnumálin…

 

1. Hjálpa heimilunum í landinu
Fjölskyldan er það besta í samfélaginu. Stjórnvöld þurfa að mæta þörfum og kröfum heimilana. Reisa þarf járnbenda skjaldborg um heimilin í landinu. Íslensk heimili eiga aðeins skilið það besta.

2. Bæta kjör þeirra sem minna mega sín
Við viljum allt það besta fyrir svoleiðis lið og bjóðum því ókeypis í strætó og sund þannig að maður geti ferðast um Reykjavík og verið hreinn þótt maður sé fátækur eða eitthvað að manni.

3. Stöðva spillingu
Við lofum að stöðva spillingu. Við munum gera það með því að stunda hana fyrir opnum tjöldum

4. Koma á jöfnuði
Allir eiga það besta skilið sama hverjir þeir eru og hvaðan þeir koma. Við munum gera best fyrir alla þannig að allir séu saman í besta liðinu.

5. Auka gegnsæi
Það er best að hafa allt uppá borðinu þannig að almenningur viti hvað er að gerast. Við segjumst styðja það.

6. Virkt lýðræði
Lýðræði er ágætt en virkt lýðræði er best. Þess vegna viljum við það.

7. Fella niður allar skuldir
Við hlustum á þjóðina og gerum eins og hún vill því þjóðin veit best hvað er sér fyrir bestu.

8. Ókeypis í strætó fyrir námsmenn og aumingja
Við getum boðið meira af ókeypis en allir aðrir flokkar því við ætlum ekki að standa við það. Við gætum haft þetta hvað sem er, til dæmis ókeypis flug fyrir konur eða ókeypis bílar fyrir fólk sem býr útá landi. Það skiptir ekki máli

9. Ókeypis tannlæknaþjónusta fyrir börn og aumingja
Þetta er eitthvað sem vantar og við viljum endilega taka þátt í að lofa því

10. Ókeypis í sund fyrir alla og frí handklæði
Þetta er eitthvað sem allir ættu að falla fyrir og er það kosningaloforð sem við erum stoltust af

11. Láta þá svara til saka sem bera ábyrgð á hruninu
Fannst við verða að hafa þetta með.

12. Algjört jafnrétti kynja
Við lofum algjöru jafnrétti vegna þess að það er best fyrir alla.

13. Hlusta meira á konur og gamalt fólk
Það er alltof lítið hlustað á þetta lið. Það er eins og öllum finnist það bara vera eitthvað að röfla. Við ætlum að breyta því.

Facebook